ABI MANYU Bahasa jawa lengkap

ABI MANYU

            Abimanyu menika salah satunggaling paraga wayang wonten cariyos Mahabharata. Piyambakipun menika putrananipun Arjuna kaliyan salah satunggaling garwanipun Dewi Wara Sembadra. Papan dununganipun wonten ing kasatriyan Tanjunganom iya Plangkawati.

a.      Nami

Tembung Abimanyu kadadosan saking kalih wanda Sansekerta,  inggih menika Abhi, ingkang artosipun kendel lan manyu, ingkang artosipun watak. Dasose, artosipun Abimanyu menika tiyang ingkang gadahi watak kendel. Dasanaminipun Abimanyu inggih menika :

•          Angkawijaya

•          Partasuta

•          Sumbadraja

•          Aribawa

•          Jayamurcita

•          Arjunatanaya

•          Kiritiatmaja

•          Jaka Pengalasan

•          Wanudara

•          Pamulatsih

•          Banjaransari

•          Bimamanyu

b.               Sederekipun

Abimanyu gadhah 13 sederek saking sanes-sanes ibu, inggih menika Sumitra, Bratalaras, Bambang Irawan, Kumaladewa, Kumalasakti, Wisanggeni, Wilungganggga, Ending Pregiwa, Ending Pregiwati, Prabakusuma, Wijanarka, Antadewa, lan Bambang Sumbada.

c.                Gambaranipun Abimanyu

Ing padhalangan, Abimanyu menika digambaraken kadadine satriya  kang bagus citrane, alus budine, tanggung jawab, nanging kala-kala getapan (gampang nesu) lan gampang mara tangan. Kaya ingkang rama, Abimanyu kondhang kadidene satriya utama sing kuat tapabratane, mula Abimanyu klakon kasinungan wahyu-wahyu kanarendran, kayata wiwit wonten kandutan piyambakipun sampun pikantuk Wahyu Hidayat ingkang mumpuni mangertosi sedaya bab perkawis. Ugi Wahyu Cakraningrat, salah satunggaling wahyu ingkang saged nurunaken raja-raja ageng, piyambakipun ugi pikantuk Wahyu Antatwulan, lan sapiturute. Miturut wecaning dewa sinten ingkang pikantuk wahyu-wahyu  menika bakal bisa dadi narendra gung binatara. Nanging Abimanyu mboten ngantos klakon madeg ratu, jalaran piyambakipun gugur wonten paperangan Barathayudha ing Tegal Kurusetra kanthi dikrocok gegaman lan dikroyok dening para Kurawa.

d.               Abimanyu nalika tasih alit

Nalika tasih alit, Abimanyu nelasaken wekdalipun wonten Dwaraka, kitha lenggahipun Ibunipun. Lan wekdal tasih alit, Abimanyu klakon nyirnakake nata ing Plangkawati, Prabu Angkawijaya lan patihe aran Jayamurcita, kang nduwe kekarepan arep nggarwa Dewi Wara Sumbadra, ibunipun, ingkang sampun diwengku garwa dening Arjuna lan peputra Abimanyu. Prabu Angkawijaya lan Jayamurcita tiwas saka tangane Abimanyu. Sukmane manjing ana ragane Abimanyu, lan negarane uga banjur dadi kasatriyane Abimanyu.

e.               Garwanipun Abimanyu

Garwanipun Abimanyu menika 2, inggih menika :

1.      Dewi Siti Sundari, putrinipun Prabu Kresna, Raja ing Negari Dwarawati kaliyan garwanipun Dewi Pratiwi.

2.      Dewi Utari, putrinipun Prabu Matsyapati kaliyan garwanipun Dewi Ni Yutisnawati, saking negari Wirata. Saking Dewi Utari, Abimanyu ghadah detunggal putra inggih menika Parikesit.

f.        Gugure Abimanyu

Ing Perang Baratayuda, Abimanyu bisa klakon mbedhah gelar perang Cakrabhyuha, sing dipandhegani Pandhita Durna nadyan akhire gugur kanthi tatu arang kranjang amarga diranjap gegaman marang Kurawa. Mula lakon Abimanyu gugur uga asring karan "Ranjapan Abimanyu Gugur" kang pancen ngeres-eresi.

g.      Abimanyu lan Lesmana mati sampyuh

Ing peperangan Barathayudha, Abimanyu ingkang belani Pandhawa menika sampun tatu arang kranjang lan katon tanpa daya, nanging tesih tetep maju. Lesmana Mandrakumara iya Raden Sarojakusuma (putrane Prabu Duryudana, nata Ngastina) kang kepingin mrejaya Abimanyu, banjur maju nyaketi karo nggawa keris ligan. Keris iku arep kanggo nyuduk Abimanyu, nanging kurang prayitna. Abimanyu tetela isih nggegem keris Kyai Pulanggeni. Lesmana namake kerise marang Abimanyu kang njalari tumekeng pati. Nanging sadurunge sukmane oncat saka ragane, Abimanyu uga kasil nyuduk Lesmana Mandrakumara nganggo Pulanggeni nganti Lesmana tumekaning pati. Kekarone mati sampyuh. Weruh Lesmana Mandrakumara mati, Jayadrata (bapa pamane Lesmana) ngepruk sirahe Abimanyu kang wis tanpa daya nganggo gada Kyai Glinggang saengga musthakane ajur mumur. Abimanyu gugur ing madyaning rananggana. Para Kurawa surak ambata rubuh. Goteking wong akeh sing mateni Abimanyu iku Jayadrata iya Tirtanata. Abimanyu gugur wekdal yuswa 16 taun.

Miturut crita, Abimanyu menika bayanganipun putranipun Dewa Bulan. Nalika sang Dewa dipunpundhuti pirsa dening Dewa sanesipun ngengingi tindakipun putranipun wonten Bumi, Dewa Bulan nimbali menawi piyambakipun damel perjanjian menawi putranipun manggen wonten bumi namung laminipun 16 taun. Mula Abimanyu wekdal yuswa 16, piyambakipun kepejahan wonten ing peperangan.

h.     Sawise Abimanyu gugur

Udan tangis para pepundhen Pandhawa. Arjuna, ramanipun Abimanyu sumpah, yen dina iku uga ora bisa mateni Jayadrata, dheweke luwung lampus dhiri. Dening para Kurawa Jayadrata diumpetake ing gedhong waja. Dijaga rapet, pamrihe supaya aja nganti bisa dipateni dening Arjuna lan Arjuna dhewe supaya klakon "tata glondhong" lampus dhiri kanthi cara pati obong. Nanging bab iku diwuningani Prabu Kresna (botohe Pandhawa). Jayadrata dipancing murih ngungak kahanan njaba liwat jendhela. Ya nalika Jayadrata anguk-anguk liwat jendhela kuwi, Arjuna nglepasake jemparinge Kyai Sarotama. Ngenani janggane jayadrata saengga tugel thel lan sirna margalayu.